អន្តរជាតិ៖ អ៊ុយក្រែនបានប្រកាសឯករាជ្យរបស់ខ្លួនបន្ទាប់ពីសហភាពសូវៀតដួលរលំនៅឆ្នាំ១៩៩១។ នៅពេលនោះ ផ្នែកដ៏ច្រើននៃឃ្លាំងអាវុធនុយក្លេអ៊ែរសូវៀតត្រូវបានដាក់ក្នុងព្រំដែនអ៊ុយក្រែន ហើយខ្លួនបានយល់ព្រមផ្ទេរអាវុធទាំងនោះទៅឱ្យប្រទេសរុស្ស៊ី។

ប៉ុន្មានឆ្នាំក្រោយមក រដ្ឋាភិបាលជាប់ឆ្នោតតាមបែបប្រជាធិបតេយ្យរបស់អ៊ុយក្រែនកាន់តែខិតទៅជិតអឺរ៉ុបខាងលិច។

ឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិ លោកស្រី Pamela Falk មានប្រសាសន៍ថា មហិច្ឆតារបស់លោក ពូទីន គឺដើម្បី «ស្តារចក្រភពរុស្ស៊ី» ឡើងវិញបន្ទាប់ពីបានបញ្ចូលឧបទ្វីបគ្រីមៀរបស់អ៊ុយក្រែន ដែលកងកម្លាំងរបស់លោកបានដណ្តើមយកក្នុងឆ្នាំ២០១៤។

កងកម្លាំងរុស្ស៊ីបានលុកលុយភាគខាងកើតអ៊ុយក្រែនក្នុងឆ្នាំ២០១៤ ហើយលោក ពូទីន បានអះអាងថាការវាយប្រហារនេះគឺគ្រាន់តែជាការការពារជនជាតិរុស្ស៊ីដែលរស់នៅក្នុងតំបន់ Donbas ភាគខាងកើតនៃប្រទេសអ៊ុយក្រែន ដែលមិនគាំទ្ររដ្ឋាភិបាលថ្មីនិងនិយមលោកខាងលិចរបស់ប្រទេសនេះ។

លោក ពូទីន បានប្រើការឈ្លានពានដើម្បីទាមទារផ្នែកមួយនៃអ៊ុយក្រែនយ៉ាងពិតប្រាកដសម្រាប់រុស្ស៊ី ដោយការបញ្ចូលឧបទ្វីបគ្រីមេជាឯកតោភាគី។ ឧបសម្ព័ន្ធនេះមិនត្រូវបានសហគមន៍អន្តរជាតិទទួលស្គាល់ទេ ប៉ុន្តែរុស្ស៊ីបានគ្រប់គ្រងទឹកដីដោយមិនប្រកែកតាំងពីឆ្នាំ២០១៤មក។

ចាប់តាំងពីការបញ្ចូលឧបទ្វីបនេះមក សង្គ្រាមបានធ្វើឡើងនៅ Donbas រវាងកងកម្លាំងដែលគាំទ្រដោយរុស្ស៊ី និងរដ្ឋាភិបាលអ៊ុយក្រែន។ យោងតាមរដ្ឋាភិបាលអ៊ុយក្រែនបានឱ្យដឹងថា កិច្ចព្រមព្រៀងសន្តិភាពឆ្នាំ២០១៥ បានបិទបញ្ចប់ការប្រយុទ្ធសំខាន់ៗប៉ុន្តែការប្រយុទ្ធគ្នាបានបន្តហើយបានធ្វើឱ្យមនុស្សជាង ១៤ ០០០ នាក់បានស្លាប់នៅក្នុងដំណើរការនេះ។

នៅថ្ងៃទី២១ ខែកុម្ភៈ លោកពូទីនបានទទួលស្គាល់ជាឯកតោភាគីនូវឯករាជ្យភាពនៃតំបន់បំបែកពីរនៅ Donbas ដែលជា "សាធារណរដ្ឋប្រជាមានិត" ដែលប្រកាសដោយខ្លួនឯងគឺ Donetsk និង Luhansk ហើយទង្វើនេះបាននាំឲ្យអាមេរិក និងសម្ព័ន្ធមិត្តដាក់ទណ្ឌកម្មថ្មីលើរុស្ស៊ី៕